Стихотворный канон иконе Божией Матери «Боголюбская»
Публикация свящ. М. Асмуса
Ниже приводится текст канона Боголюбской иконе Божией Матери (18 июня / 1 июля), принадлежащий перу Святейшего Патриарха Московского и всея Руси Сергия (Страгородского). В надписании канона автором указано «эксаметрический», однако в действительности канон написан элегическим дистихом, чему должна соответствовать характеристика «ироико-элегический»: одна строка гекзаметрическая («героическая»), вторая — пентаметрическая с обязательной цезурой посредине («элегическая»).
При публикации в «зеленых Минеях» текст был отредактирован, чем в нескольких местах был нарушен размер. Кроме того, не соответствует требованиям размера и разбивка на певческие колена и некоторые ударения. В настоящей публикации текст разбит на строки и колена (греч. «колоны») в полном соответствии с размером, реконструированы необходимые формы, порядок слов и недостающие слова (без обращения к архивным материалам). Благодаря этому выявилась последовательно проведенная концевая рифма.
Наконец, автором публикации было восполнено основное гимнографическое требование канона — метрическое подобие ирмоса и тропарей: стандартные богородичные ирмосы «Отверзу уста моя» переложены тем же ироико-элегическим размером, каким написан канон. Для поэтической цельности композиции припевы к тропарям предложены в гекзаметрической форме.
Песнь 1
Ирмос
Се отверзу уста и наполнятся силою Духа, /
Да отрыгну глагол, / Мати Царице, Тебе: /
Ты благодать мне подаждь Твое торжество сотворити, /
Яко да, радуяся, / славлю Твоя чудеса.
Боголюбивая Мати, помилуй Тебе вопиющих.
Слово рабу Твоему подаждь, Госпоже Пресвятая, /
Слово бо сниде на Тя, / якоже свыше роса, /
Грешную душу мою очисти, Царице Благая, /
Яко да, радуяся, / славлю Твоя чудеса.
Боголюбивая Мати, помилуй Тебе вопиющих.
Князю Андрею в нощи представши, Небесная Мати, /
В сердце смятенном его / бурю сомнений Ты всех /
Кротце смирила еси, подвигши того воспевати /
Милость и силу Твою, / дивну всегда в чудесех.
Слава Отцу Безначальну и Сыну и Духу Святому:
Руце простерла еси, молитвенно Сыну представши: /
Славы и милости луч, / Сыне, да сходит с небес /
Людем и месту сему. Того умоли о создавших /
Храм и обитель сию, / Рождшая бездну чудес.
Ныне, во вся времена и во веки веков, непреложно.
Боголюбивая всех Царице, обители славо, /
Грешных, молящихся нас / днесь, приими словеса, /
Дерзость врагов низложи, неверных разруши державу, /
Верным же присно подаждь / пети Твоя чудеса.
Песнь 3
Ирмос
Песнопевцы Твоя, святыя составльшия лики, /
К пению Ты утверди / Рождшая Бездну щедрот. /
Яко живый изобильный Источник, Пречистая Мати, /
В славе небесней Твоей / славою нас увенчай.
Боголюбивая Мати, помилуй Тебе вопиющих.
Чтуще икону Твою, вси в скорби к Тебе прибегаем, /
Точиши бо, Госпоже, / Ты утешение всем, /
В радости паки Тебе, Пречистая, песнь воспеваем. /
Темже подаждь, да и аз / милость Твою исповем.
Боголюбивая Мати, помилуй Тебе вопиющих.
Светло красуется днесь обитель сия всечестная, /
Образ имущая Твой, / яко источник цельбам, /
Ты же, Заступнице всех, Споручнице грешных святая, /
Спаса Христа преклони / к нашим смиренным мольбам.
Слава Отцу Безначальну и Сыну и Духу Святому:
В бури пристанище всем, о, Боголюбивая Мати, /
Сущим в пути и в бедах, / в мори далече покров, /
Спутница верная всем: Тебе бо дадеся спасати /
Души убогих Твоих / Тя возносящих рабов.
Ныне, во вся времена и во веки веков, непреложно.
Вечныя муки и тьмы, губительных вражиих сетей, /
Чистая Дево, спаси, / Тя призываем в мольбе, /
Славу же Бога духов безсмертных сподоби нас зрети /
В светлых чертозех Его: / вся бо возможна Тебе.
Песнь 4
Ирмос
В славе седяй со Отцем на престоле божественнем вечнем, /
Облаком легким носим / к нам снизойде Иисус, /
Дланию вечною смерти избавль Тому вопиющих: /
«Слава, Христе Всецарю, / Божией силе Твоей».
Боголюбивая Мати, помилуй Тебе вопиющих.
Облаком легким носим, Твой Сын, Пресвятая, прииде, /
Матере волю творя. / Князь же блаженный Андрей, /
Пад со слезами во прах, прослави о всех, яже виде: /
«Слава, Христе, – вопия, – / Божией силе Твоей».
Боголюбивая Мати, помилуй Тебе вопиющих.
Светом Твоим просвещен, на Горнюю славу взирая, /
Глас Пребожественный Твой / слыша блаженный Андрей, /
Духом Святым взыграв, воспе о Тебе, Пресвятая: /
«Слава, Христе Всецарю, / Божией силе Твоей».
Слава Отцу Безначальну и Сыну и Духу Святому:
Милость Его и покров молящимся нам ниспослати /
Сына и Бога моли, / Чистая, верных людей /
Щите, забрало Церквей, вселенней реко благодати, /
Яко да песнь принесем / велией силе Твоей.
Ныне, во вся времена и во веки веков, непреложно.
Облаче светлый Христов, неверия мглы нас избави, /
Верным ослабу подаждь / в жизни привременней сей, /
Церковь Святую Твою незыблему в мире управи, /
Яко да вси воспоем: / «Слава державе Твоей!»
Песнь 5
Ирмос
Изумишася вся о Твоей божественней славе: /
Ты бо еси зачала / брачна искуса кроме /
Бога владящаго всем, родила же превечнаго Сына, /
Всем воспевающим Тя / мир подавающаго.
Боголюбивая Мати, помилуй Тебе вопиющих.
Сына Безлетнаго Ты носила еси несказанно, /
Грешным спасение всем / светло вещающая; /
Ныне о нас, Госпоже, молися Тому непрестанно, /
Всем воспевающим Тя / мир подавающая.
Боголюбивая Мати, помилуй Тебе вопиющих.
Присно Твоя благодать, Царице, нисходит на место, /
Еже избрала еси, / всем источающая /
Дары целебныя, тем поем Тебе, Богоневесто, /
Верою славящим Тя / мир подавающая.
Слава Отцу Безначальну и Сыну и Духу Святому:
Обремененнии вси страстьми и недуги, грядите, /
Воду спасительную, / всех исцеляющую, /
Зде от иконы сея в веселии днесь почерпите, /
Славяще Матерь Христа, / мир подавающую.
Ныне, во вся времена и во веки веков, непреложно.
Глада, огня и меча, нашествия иноплеменных /
Язв губительных / присно спасающая, /
Мати Всепетая, днесь услыши мольбу нас, смиренных, /
Бурю страстей утиши, / мир подавающая.
Песнь 6
Ирмос
Сей всечестный и божественный вкупе праздник творяще /
Богородительницы, / мы, богомудреннии, /
Вси приидите, в веселии сердца руками восплещим /
И прославим Христа, / Ею пришедшаго к нам.
Боголюбивая Мати, помилуй Тебе вопиющих.
Боголюбивая днесь к веселию вся созывает, /
Храм преукрасивши сей / образом чудным Своим, /
Благочестивых собор Небесными дары венчает. /
Тем, богомудрии вси, / Матерь Христову почтим.
Боголюбивая Мати, помилуй Тебе вопиющих.
Радостно, вернии вси, грядите, восплещим руками, /
Зряще Превысшую всех / ангельских горних чинов /
Деву, Царицу Небес, во храме днесь сущую с нами, /
Всем источающую / токи целебных даров.
Слава Отцу Безначальну и Сыну и Духу Святому:
Разве Тебе, Госпоже, не имам надежды иныя: /
Ты мя избави от бед, / Ты помози до конца /
Поприще мне преити неблазненно жизни земныя, /
Да воспою Тя всегда, / рождшую мiру Творца.
Ныне, во вся времена и во веки веков, непреложно.
Призри, Святая, с Небес, к рабом Твоим в помощь потщися, /
Всякую язву, болезнь, / всякий недуг исцели. /
Старцу согбенному жезл, Заступница сирым явися, /
Мати Отершаго вся / горькия слезы земли.
Песнь 7
Ирмос
Не послужиша созданию вместо Создателя дети, /
Мужеским духом огня / не убоявшеся кар. /
Страх же поправше, с веселием пети начаша: «Препетый /
Господи Боже отец, / благословен еси Ты».
Боголюбивая Мати, помилуй Тебе вопиющих.
Славит Тя присно страна Российская, Дево, имущи /
К Богу Ходатаицу / теплую на Небеси, /
Темже и празднует днесь, Тебе благодарне поющи: /
Мати Христова, во век / благословена еси.
Боголюбивая Мати, помилуй Тебе вопиющих.
Град и обитель сию Твоим омофором, Честная, /
Присно покрый и мольбу / нашу горе вознеси /
К Сыну и Богу щедрот, да славим Тя вси, Преблагая, /
Боголюбивая, Ты / благословена еси.
Слава Отцу Безначальну и Сыну и Духу Святому:
Зноя палящаго вся избави, дождь ранний и поздний /
Жаждущей люте земли / Щедраго дати проси, /
Нивы от вреда спаси, да милость присно Господню /
Славим, Тебе же поем: / благословена еси.
Ныне, во вся времена и во веки веков, непреложно.
Людем Твоим, Госпоже, земли устроение зрети, /
Мудрость в правителех, суд / правый сподоби, да вси /
В мире всегда поживем, немолчно дерзающе пети: /
Мiру Хранительнице, / благословена еси.
Песнь 8
Ирмос
Дети святыя в пещи Богоматери Чадо избави, /
В образе сущи тогда: / ныне же действующи, /
Всю вселенную пети усердно с детьми воздвизает: /
«Господа пойте, дела, / и возносите всегда».
Боголюбивая Мати, помилуй Тебе вопиющих.
Образом, Дево, святым обходиши веси и домы, /
Всякому возрасту честь, / всем христианом хвала, /
Всех ты надежда еси, Тобою бо род наш блюдомый /
Славит усердно Творца: / Господа пойте, дела.
Боголюбивая Мати, помилуй Тебе вопиющих.
Веру мою приими, пристанище тихое буди; /
Душу, Благая, спаси, / Ты бо еси родила /
Спаса нам, грешным, Христа. Убогих Твоих не забуди, /
Даруй нам звати всегда: / Господа пойте, дела.
Благословим Отца и Сына и Духа Святаго:
Тело мое исцели, страстей треволнение вскоре, /
Дево, в души укроти. / Ты бо еси низвела /
Свыше Божественный мир на волны житейскаго моря /
Верно поющим всегда: / Господа пойте, дела.
Ныне, во вся времена и во веки веков, непреложно.
В день оный страшный конца, егда пробуждении встанем /
Гласом последней трубы, / буди нам Ты похвала, /
Руце воздевши Твои, Благому за грешных предстани, /
Да одесную Того / Господа хвалим, дела.
Песнь 9
Ирмос
Всяк земнородный, взыграй просвещаемь Божественным Духом, /
Всяка же сила небес, / празднуй бесплотным умом /
Праздник священный Родившия Бога. Вси Той возопийте: /
«Буди блаженна всегда, / Чистая Мати Творца».
Боголюбивая Мати, помилуй Тебе вопиющих.
Всяк земнородный в сей день, Святым просвещаемый Духом, /
Весело радуяся / Горних умов естеству, /
Тайно поющему зде, да внемлет очищенным слухом, /
Вся да поклонится тварь / девственному Рождеству.
Боголюбивая Мати, помилуй Тебе вопиющих.
Иноков лики и дев, Пречистыя праздник почтите, /
Мужи, и жены, и вси, / радостно днесь к торжеству /
С нами сошедшеся зде, псаломски играюще, рцыте: /
Дево, да будет во век / честь Твоему Рождеству.
Слава Отцу Безначальну и Сыну и Духу Святому:
Верных пресветлый собор, Пречистая, днесь назирает /
Свыше Свою благодать, / душ и телес врачевство, /
Грешным прощение, всем ослабу долгов обещает: /
Матерь бо слышит Свою / присно Тоя Рождество.
Ныне, во вся времена и во веки веков, непреложно.
Боголюбивей воздах устен похвалу и молюся: /
Буди Споручница ми, / храме святый Божества, /
В час испытания дел, егда пред судищем явлюся, /
Дево, умилостиви / суд Твоего Рождества.